সোঁৱৰণিৰ মমতা

ৰাজবীৰ গগৈ

আজি বহু দিন হʼল ঘৰৰ পৰা নোলোৱা,

আইক নেদেখা পিতাইৰ মাত নুশুনা

শীতৰ দলংখন পাৰ হৈ যি এচৰিয়া এন্ধাৰত সোমোৱা

নৈ-নিজৰা, পাহাৰ-পথাৰ, আনন্দ-উৎসৱ একোকে ভাল নলগা হʼল।

নকৈ গজা দৰৱত লগা নল-বনত বাটটো ঢাক খায় গʼল।

সেয়া যে মমতা

বন গজা চকুৰেও তোক মনিব পাৰিছো

অʼ সোঁৱৰণী !

পাটিত চপোৱা জোনাকৰ পোহৰত কাণি মুনি বেলিকা 

অʼ মোৰ লʼৰালিৰ সাধু সেয়া ত‌য়ে নহয়নে 

নৰীয়া গাৰে মাটি চাকিৰ পোহৰত লেখি লেখি আখৰৰ জঁকা !

ময়ো বিচনাত,

আজি বহু দিন হʼল ঘৰৰ পৰা নোলোৱা 

পথাৰ নেদেখা, নদীক নুশুনা।

বৰষুণজাকৰ শেষত যি নিৰাশাৰ শংখত সোমোৱা 

কুৰুৱা - পছোৱা, শালিকী - জোনাকী, ‌উকুলি-মুকুলি 

একোকে নুশুনা হ'লো।

ন বাটেৰে নৈখনে পুৰণি দলংখনৰ কামিকেইডাল লৈ যায়,

সেয়া যে মমতা পৰুৱাই পোৱা কাণেৰেও তোক শুনিব পাৰিছো 

অʼ সোঁৱৰণী !

সেয়া যে মমতা নেটৱৰ্ক নোপোৱা 

মৰ্গৰ শীততো তোক চিনিব পাৰিছো 

অʼ সোঁৱৰণী।

অʼ সোঁৱৰণী। 

ঠিকনাঃ নাজিৰা

ফোন- ৬০০৩৯৩৩১২৫